Logo da deliberación dos seus socios e socias a Asociación Cultural  Altofalante acorda:

distinguir co seu galardón anual Altofalante do ano 2007 á Plataforma polo Ensino en Galego polas seguintes razóns:

Por ser quen de facer fronte común para a defensa do uso da lingua propia do noso país como lingua vehicular no noso ensino e pola defensa do cumprimento da lexislación lingüística máis alá de diferenzas ideolóxicas e fronte aos ataques contra un ensino en lingua galega por parte de distintos colectivos antigalegos minoritarios apoiados a última hora polo Partido Popular, que rompeu o consenso que supuxo o Plan xeral de normalización da lingua galega que se aprobou por unanimidade en 2004 e que foi impulsado polo propio PP.

As organizacións máis representativas do conxunto da comunidade educativa uníronse para a defensa da galeguización do ensino e impulsaron un manifesto en defensa do dereito á escolarización na lingua propia de Galiza. Son a confederación de asociacións de nais e pais, os sindicatos que representan o 90% do profesorado galego, a federación de escolas católicas concertadas, organizacións estudantís, de nais e pais, de renovación pedagóxica, etc. Isto é, todos os sectores do ensino apoiando a súa galeguización.

As organizacións que forman parte desta plataforma son:

• A Mesa pola Normalización Lingüística
  
• AS-PG (Asociación Socio-Pedagóxica Galega)
  
• CAE (Comités Abertos de Estudantes)
  
• CCOO-Ensino (Comisións Obreiras)
  
• CIG-Ensino (Confederación Intersindical Galega)
  
• CONFAPA (Confederación Galega de APAs de centros públicos)
  
• FERE-CECA (Federación Española de Relixiosos de Ensino - Centros Católicos)
  
• FETE-UXT (Federación de Traballadores do Ensino - Unión Xeral de Traballadores)
  
• FSIE (Federación de Sindicatos Independentes do Ensino)
  
• Mocidade pola Normalización Lingüística
  
• Nais e Pais polo Ensino en Galego
  
• NEG (Nova Escola Galega)
  
• SE (Sindicato de Estudantes)
  
• STEG (Sindicato de Traballadoras/es do Ensino de Galiza).
  

A entrega do premio farase efectiva no transcurso dunha cea o vindeiro sábado 1 de decembro en Ribeira.

Logo do éxito de participación da Carreira do Corgo Pola defensa da Paisaxe en Corrubedo organizada por Altofalante e Pau da Lus, podedes ver as fotografías que nos chegaron cliclando aquí. Tamén podedes ver a clasificación xeral da proba.

Fotos tomadas por Eduardo Iglesias e Xavi Seco

Podedes consultar o listado provisional de persoas apuntadas na I Carreira do Corgo "Pola defensa da Paisaxe" de Corrubedo, na seguinte ligazón

Se alguén observa algún erro, enviade de xeito urxente un correo a altofalante@altofalante.org para que o día da carreira estén os listados correctos

A asociación cultural Altofalante, conmemora por segundo ano consecutivo a Muiñada, nos muíños sitos no lugar de Amendo na parroquia de Carreira, no entorno do Parque Natural.

A actividade desenvolverase o vindeiro sábado 21 de abril e convídase a participar a todas as persoas que así o desexen.

O programa consistirá en:

11:30 Moenda e charla sobre os muíños de Amendo.

12:00 Fornada e degustación de pan de millo elaborado no forno dun dos muíños.

12:30 Repoboación polos rapaces e rapazas, dunha espacio queimado, dirixida por Juan Francisco Ramallo Dorca, Presidente da Comunidade de Montes de Carreira. Colocarase unha placa na zona repoboada.

14:00 Xantar, levarase comida para compartir.

16:00 Xogos populares (ra, petanca, zancos, ....). Os xogos estarán a disposición dos nenos toda a xornada.

17:30 Contos no muíño, "Contos que non falten", por Celso Fdez. Sanmartín, contacontos do Deza.

18:30. Actuación das pandereteiras da Asociación Cultural O Rueiro dos fillos de Palmeira.

Xornada amenizada polos gaiteiros: estreno da Muiñada de Amendo, composta por Pepe Romero.

Contaremos tamén coa actuación da Charanga Dorneira.

A Actividade é promovida pola Asociación Cultural Altofalante.

Colaboran:

Consellería do Medio Rural, Consellería do Medio Ambiente (Parque Natural de Corrubedo), Deputación de A Coruña, Comunidade de Montes de Carreira, Asociación de Propietarios Afectados polo Parque Dunar de Corrubedo e Lagoas de Carregal e Vixán, ANPAS dos colexios de Carreira: San Roque, Frións e a Guía.

Barbantia, Altofalante, La Voz de Galicia e a editorial Galaxia organizan a presentación da Biblioteca Compostela de Narrativa Europea e a mesa redonda "A tradución en Galiza". O acto, que coincide coa saída dun novo número do suplemento cultural A voz de Barbantia, terá lugar o venres 23 de febreiro, ás 20'30 h., na Casa do Mar de Ribeira, e contará coa participación de Luís Teira, presidente da A.C. Altofalante; Manuel Cartea, membro de Barbantia; Xosé Manuel Gómez Clemente, presidente da Asociación de Tradutores de Galicia; Carlos Lema, Director de edicións da editorial Galaxia e Anxo Rei Ballesteros, escritor e tradutor.

O Ateneo Valle-Inclán e a Asociación Cultural Altofalante, en colaboración con Edicións Xerais de Galicia, organizan a presentación da novela Tres segundos de memoria de Diego Ameixeiras.

O acto desenvolverase o vindeiro venres 12 de xaneiro ás 20:00 no Bar Plaza de Ribeira e contará coa presenza de:

• Oscar Núñez, músico e profesor
• Manuel Bragado, editor de Xerais
• Diego Ameixeiras, autor da obra

Finalizado o acto haberá un concerto a cargo do grupo Desafinando.

Tres segundos de memoria é a obra ganadora do premio Xerais de 2006, e nela descríbese a xeito de diario, a vida dun xoven que con formación universitaria se busca a vida a través de emprego precarios. Unha obra con tintes xeneracionais, áxil de ler e con altas doses de humor.

Xurxo Souto, Altofalante do ano 2006

A Asociación Cultural Altofalante de Ribeira concédelle o premio para recoñecer así o seu labor como promotor e difusor da cultura do noso país, nomeadamente por ser un claro impulsor de todas as tendencias musicais na nosa lingua durante o último ano

A Asociación Cultural Altofalante crea o Premio Altofalante do Ano para recoñecer con el o especial labor na defensa, promoción e difusión do noso país e da nosa cultura por parte de persoas ou entidades concretas. Deste xeito, a partir deste ano 2006 concederáselle anualmente o Altofalante do ano a unha persoa ou entidade que destaque por defender, promocionar e difundir a nosa cultura ou algún aspecto concreto dela para así recoñecer e apoiar o seu labor e contribuír a que este continúe. O premio consiste no recoñecemento público, na difusión do traballo da persoa ou entidade galardoada e nun altofalante de man que se lle entregará ao/á galardoado/a na cea anual da asociación para que poida seguir alzando a súa voz na defensa, promoción e difusión do noso país. O nome do premiado ou premiada darase a coñecer sempre o 13 de novembro, Día da Dignidade.

Neste 2006 a xunta directiva da asociación decidiu por unanimidade concederlle o I Altofalante do ano a Xurxo Souto, polo especial labor desenvolvido no último ano na promoción de todos os grupos e todas as tendencias musicais en lingua galega desde a Radio Galega, en especial desde o seu exitoso programa Aberto por reformas, que supuxo un antes e un despois na música do noso país, promocionando ducias de grupos que levaban tempo traballando e que até o momento non tiveran ningún tipo de difusión na radio pública do noso país e dando a coñecer moitos outros grupos novos que están a comezar.

Con este traballo, Xurxo Souto está a contribuír directamente á revitalización da música en galego sexa cal sexa a tendencia, do pop ao rock, da música de cantautor ao hip-hop, do power pop ao metal, do folk ao ská, etc. Ducias de grupos déronse a coñecer desde Aberto por reformas e desde outros programas (Extrarradio, por exemplo) e iniciativas (A polo ghit, por exemplo) da Radio Galega, emisora da que Xurxo Souto é director de programas.

O seu labor está sendo fundamental para a revitalización da música en Galiza e da lingua galega na música, polo que a Asociación Cultural Altofalante quere recoñecerllo, difundilo e darlle forzas para que siga adiante con esta xusta e necesaria tarefa.

Así, a asociación cultural ribeirense entregaralle persoalmente un altofalante de man e renderalle homenaxe nunha cea que terá lugar no mes de decembro, en data e lugar que se anunciará coa suficiente antelación.

Manuel Lustres Rivas foi un xornalista nacido en Ribeira, que defendeu posicións agraristas e galeguistas. Pagou coa súa vida, no ano ano 36, a defensa das súas ideas.

É de xustiza facer esta homenaxe en Ribeira, neste ano 2006- Ano da Memoria- o vindeiro sábado 11 de Novembro co seguinte programa:

-20:00: descubrimento dunha placa na que fora a súa casa en Ribeira, na rúa peonil.

-20:30: conferencia sobre a súa vida a cargo do xornalista Gustavo Luca de Tena. Presentación da publicación "Manuel Lustres, xornalista e galeguista" editada por Altofalante.

Peche do acto a cargo da Delegada da Consellería de Cultura e Deporte Milagres Lantes.

Asemade a Altofalante solicitou formalmente ao concello de Ribeira:

Que se elimine de Ribeira toda a simboloxía fascista que lamentablemente aínda queda na nosa cidade (nomes de rúas, escudos, etc), xa que estes son referentes dunha ideoloxía superada e da que ninguén se considera herdeiro, que causou morte e dor. Esta retirada dos símbolos serviría como homenaxe a todos os represaliados que defenderon a liberdade durante a guerra civil e o franquismo.

Tamén se solicitou que as placas do nome da rúa Lustres Rivas, sexan cambiadas por outras xa que estas están moi deterioradas.

O vindeiro sábado 4 de Novembro Xornada Micolóxica no CIELGA do parque dunar de Corrubedo. Conferencia a cargo de Antonio Rodríguez, recolección de cogumelos e degustación nos muiños de Amendo.

En setembro de 1981 saía do porto de Ribeira o palangreiro Xurelo camiño da Foxa Atlántica, onde varios paises europeos estaban depositando, a só 300 millas da costa galega, residuos radioactivos. Cunha tripulación atípica composta de ecoloxistas, xornalistas e representantes políticos de Esquerda Galega foron a denunciar publicamente o que se lle estaba facendo ao noso mar.

Dende a AC Altofalante queremos conmemorar aquel episodio da loita galega na defensa do mar da Galiza.

Pola presente convídoche a asistir ao acto Xurelo: 25 anos dunha travesía que se vai desenvolver o vindeiro sábado 23 de setembro ás 20:00 no Auditorio Municipal de Ribeira.

Neste acto proxectaranse unhas imaxes das viaxes do Xurelo á Fosa Atlántica .

Abriran o acto, como representantes daquelas viaxes:

• Manuel Rivas, escritor e xornalista. Tripulante da 1ª viaxe.

• Gonzalo Vázquez Pozo, organizador das expedicións e membro de EG. Tripulante na 1ª viaxe.

• Enrique Álvarez Escudero, ecoloxista, membro da SGHN.Tripulante na 1ª viaxe.

• Camilo Nogueira, organizador das expedicións e membro de EG.

• Pili Pereiro, activista que foi na 2ª viaxe e membro de EG.

• Ánxo Vila, Patrón do Xurelo.

• Presenta: Luís Teira, presidente de Altofalante.

Para rematar abrirase un turno de diálogo entre todos/as os participantes das viaxes e o público.

A asociación cultural Altofalante conmemora este Día das Letras Galegas organizando unha Muiñada, nos muiños situados no lugar de Amendo na parroquia de Carreira, no entorno do Parque Natural. A actividade desenvolverase o vindeiro sábado 20 de maio e se invita a participar a todas as persoas interesadas.

O programa consistirá en:

12:00 Charla, visita guiada e posta en marcha dos muiños.

13:00 Fornada e degustación de pan de millo elaborado no forno dun dos muiños.

14:00 Xantar. Levar comida para compartir.

17:00 Actuación do cañaautor: Leo Arremecaghona.

Contaremos tamén coa actuación da Charanga Dorneira e máis Gaiteiros.

Tamén se organizarán Xogos populares.

MANIFESTO ENGALEGOPUNTOGAL DO 17 DE MAIO

Desde o ano 1963, cada 17 de maio celebramos e reivindicamos en Galiza as nosas letras e a nosa lingua. Agora, a partir deste 2006, o mesmo día celebraremos ademais o Día de Internet, que pola súa vez coincide co Día Mundial das Telecomunicacións e da Sociedade da Información, que se celebra xa desde 1969. Por esta razón, desde a Asociación Cultural Altofalante queremos difundir o Manifesto Engalegopuntogal do 17 de maio.

O 2006 pode ser determinante para o futuro do galego e para a presenza de Galiza en Internet:

LINGUA

A nosa lingua, a lingua propia do noso país, sofre unha situación social e legal de anormalidade, pois socialmente aínda non é a lingua de uso normal en todos os ámbitos e legalmente aínda non ten recoñecido o mesmo estatus que o castelán. A partir deste mesmo ano temos a oportunidade de comezar a mudar esta situación co novo Estatuto de Galiza, que lle debe dar ao noso idioma, cando menos, o mesmo estatus legal que ao castelán.

Todos os galegos e todas as galegas debemos ter o deber de coñecer e o dereito a usar a nosa lingua e, consecuentemente, para ter garantido ese dereito, todas as traballadoras e todos os traballadores das administracións públicas con presenza en Galiza deben ter a obriga de coñecer o galego. Polo tanto, desde a Asociación Cultural Altofalante, pedímoslles a todas as organizacións políticas a unanimidade necesaria para incorporar no novo Estatuto o estatus que o galego precisa; unanimidade que, por outra banda, xa se acadou en 1983 cando todas as forzas parlamentarias votaron a favor de que todos os galegos e todas as galegas tivésemos o deber de coñecer e o dereito a usar a nosa lingua, decisión que, por querer incorporarse nunha lei sen estar recollida no Estatuto, non foi aceptada polo Tribunal Constitucional. Agora é o momento de retomar o acordo.

Tamén facemos un chamamento ao conxunto da sociedade galega para que reivindique ante as forzas parlamentarias a responsabilidade de retomar esa unanimidade política.

Por todo isto, a Asociación Cultural Altofalante apoia a manifestación que con este motivo convoca a Mesa pola Normalización Lingística que terá lugar en Santiago de Compostela o 17 de maio e fai un chamamento para que se participe activamente nela.

INTERNET

Este ano inicia a suma de forzas para a presenza da nosa cultura, da nosa lingua e do noso país na rede con identidade e cun dominio propio. Hai unhas semanas, coa constitución da promotora da Asociación Puntogal, comezou o proceso para que se sumen esforzos no noso país e se poida conseguir. Por isto, a Asociación Cultural Altofalante fai un chamamento ao conxunto da sociedade, nomeadamente ao movemento asociativo, ao mundo da comunicación, ao ámbito empresarial e a todas as entidades públicas galegas para unir forzas e acadar o dominio .gal para o noso país.

Ao mesmo tempo, a Asociación Cultural Altofalante apoiará todas as accións promovidas desde a Asociación Puntogal en prol do dominio galego en Internet.

A PROMOCIÓN SOCIAL DO USO DA LINGUA GALEGA

e presentación do número 13 de A Voz de Barbantia

Organizan

• Asociación Cultural Altofalante

• Asociación Cultural Barbantia

Colaboran

• A Mesa pola Normalización Lingüística

• La Voz de Galicia

Data e hora

• Venres 31 de marzo, ás 20.30 h

Lugar

• Auditorio Municipal de Ribeira

Participantes

• Ánxela Bugallo, conselleira de Cultura e Deporte da Xunta de Galiza.

• Carlos Manuel Callón Torres, presidente da Mesa pola Normalización Lingüística e natural de Castiñeiras.

• Caetano Díaz, director do xornal Galicia Hoxe e natural de Corrubedo.

• Francisco Fernández Rei, membro da Real Academia Galega, do Instituto da Lingua Galega e catedrático da Universidade de Santiago de Compostela.

• Ramón Ares, delegado de La Voz de Galicia no Barbanza.

• Luís Teira Parada, presidente da Asociación Cultural Altofalante de Ribeira.

• Xosé Ricardo Losada, escritor e secretario da Asociación Cultural Barbantia do Barbanza.

• Modera o acto: Nel Vidal Barral, técnico de normalización lingüística, membro da directiva de Altofalante e socio de Barbantia.

Obxectivos da actividade

• Poñer de relevo a cuestión da lingua na vida social do Barbanza.

• Darlles protagonismo ás entidades que traballan pola promoción social do uso do galego.

• Analizar a situación sociolingüística do Barbanza e do país, as políticas de promoción lingüística e o papel do asociacionismo cultural e das entidades participantes na promoción social do uso do galego.

• Presentar o número 13 de A Voz do Barbantia, suplemento cultural da Asociación Cultural Barbantia publicado en La Voz de Galicia.

 Manifesto: unhas rifas para o lacón e a botella de caña que sorteamos no descanso

O fútbol modesto coa selección galega

Selección galega XA! POR FIN!!!

- Árbitro tes dislexia!! .Eso é roja directa!!!.Confundes o amarillo co rojo.!!!

A Asociación Cultural Altofalante vai organizar unha xornada Micolóxica (Recollida e Degustación de setas) o vindeiro sábado 19 de Novembro. A actividade desenvolverase no Parque Natural de Corrubedo e terá o seguinte programa:

Ás 10:00 da mañán encontrarémonos no CIELGA (edificio do Parque Dunar de Corrubedo) onde se desenvolverá unha breve charla introductoria ao mundo da Micoloxía.

De 11 a 13 horas desenvolveremos unha ruta na colleremos as setas.

A partir das 13 horas faremos unha degustación gastronómica coas setas recollidas nun dos muíños restaurados que están situados no Parque Dunar.

Contarase con monitores/as con experiencia e amplos coñecementos no mundo das setas.

Recoméndase levar chuvasqueiro e calzado cómodo. Tamén se deberá levar un coitelo ou navalla e unha cesta.

A Asociación Cultural Altofalante vai iniciar unha serie de debates públicos, denominados Falando a modo . Nesta primeiro Falando a modo vaise abordar a cuestión dos incendios en Galiza.

Entendemos que este é un tema de candente actualidade, sobre todo na nosa comarca, sobre o que é preciso atopar solucións. Por iso a Asociación Cultural Altofalante vai organizar este debate no que van estar representados entidades e administración que teñen moito que dicir sobre a cuestión. O público asistente vai poder participar no debate aportando ideas e plantexando cuestións aos intervintes.

O debate vaise desenvolver no Auditorio Municipal de Ribeira o vindeiro día 22 de Outubro de 2005 ás 19,00.

Intervintes:

• Alberte Blanco Casal, Director Xeral de Montes e Industrias Forestais.

• Oscar Freire, Membro de ADEGA.

• Francisco Dans, Membro da Asociación Forestal de Galicia.

• José Francisco Ramallo Presidente da Mancomunidade de Montes de Carreira.

• Moderadora: Ánxeles González Crujeiras, Vicepresidenta de Altofalante.